नवी दिल्ली: इंडियन प्रीमियर लीग 2020 तेरावा सिझन 19 सप्टेंबरपासून संयुक्त अरब अमीरातमध्ये सुरु होऊ शकतो. तर आयपीएलची फायनल आठ नोव्हेंबरला होऊ शकते. बीसीसीआयच्या सूत्रांनी गुरुवारी पीटीआयला ही माहिती दिली.

आयपीएल व्यवस्थापन परिषदेची बैठक पुढील आठवड्यात होणार आहे, या बैठकीत आयपीएलबाबत अंतिम निर्णय घेतला जाणार आहे. बीसीसीआयने आपल्या निर्णयाबाबत फ्रेंचायजींना देखील माहिती दिली आहे.बीसीसीआयच्या एका वरिष्ठ अधिकाऱ्याने सांगितले की, आयपीएल 19 सप्टेंबरपासून सुरु होईल आणि 8 नोव्हेंबरला फायनल खेळवली जाईल. यानुसार आयपीएलच्या 13 वे सिझन हे 51 दिवसांचे असेल.

आयसीसीने ऑक्टोबर-नोव्हेंबरमध्ये होणारी टी 20 विश्वचषक स्पर्धा रद्द करण्याचा निर्णय घेतला आहे. त्यामुळे आयपीएल होण्याची दाट शक्यता आहे. आयपीएल नंतरे टीम इंडियाचा आस्ट्रेलिया दौरा होणार आहे. त्यामुळे भारतीय संघाला आस्ट्रेलिया सरकारच्या नियमानुसार त्या दौऱ्यात 14 दिवस क्वारंटाईन राहावे लागणार आहे.